雖然已經係夜深，聽朝仲要返早，但都要寫完這篇網誌才睡得著！
因為要跟大家分享期待已久的拉闊音樂會！這個組合跟好多同年紀層的朋友都會有一個情義結。
今晚差不多９點才開場，大約２個半小時的演出，當中有差不多１個鐘係Eason Chan Talk Show！
哈哈，所以整個音樂會只有２９首歌，有些驚喜，有些意料之內，也有些失望無唱（少女的祈禱，幸福摩天輪，我的命運．．．）當然，佢地３個咁多正歌，實在太難選曲，況且，他們唱幾多首歌，大家都唔夠喉啦！ 連他們三私下傾選曲也有意見分歧，究竟要照顧觀眾感受，演唱大家喜歡聽的，還是依照自己意願，選擇自己喜愛的？相信這個Rundown算是滿足到各人需要。
先說說觀眾，今晚都有不少明星來集體回憶，何韻詩，劉浩龍，徐濠縈，黃偉文，還有我影不到的蘇永康，容祖兒，關楚耀，林夕等等．．
跟其他音樂會不一樣，整個演唱會不是分開３部份演出，拉闊音樂會的Crossover除了互唱對方金曲，歌手無份唱都未必會落台，好多時都坐響側邊聽，Eason仲響千嬅同Edmond合唱「滾」果陣出黎「勸交」，真係交足戲。
千嬅這晚有超水準演出，唱梁漢文首「好朋友」好感動！「洋蔥」是驚喜之作！聽到她狀態回勇！首次聽「火鳥」的拉闊也同樣動人！不過好像比較少她的歌曲．．．十
Edmond比較平穩，唱「飛女正傳」也是之前聽過的，反而聽他跟Eason的幾首歌都幾新鮮，幾有力！其他梁漢文歌曲都是大熱作品，超讚！他的鋼琴伴奏也很出色，但今次沒有見他自彈自唱。
Eason在「纏綿遊戲」唱前奏已經好驚喜，雖然其他選曲比較冷門，但都幾好聽，唱「六月飛霜」及「狼來了」雖然有些失準，但依然感覺超棒！
演唱會有王雙駿就會有些歌曲重新編曲，這次「明年今日」及「狼來了」都好正！美中不足是缺少了梁漢文的一首～
唱左大半個Show，他們說話不多，但後半部卻變成了吹水會，由點樣坐到坐係度講出道，揀歌一直吹到台北，大馬，唱片公司高層到Chok神通通被擺上台做話題，令全場觀眾笑到甩褲，雖然Edmond主要都係做聽眾，但沒法子，Eason實在太吹得啦。如果Eason跟千嬅開一個Talk Show，一定爆！
唔知今晚個Show會唔會出碟，但相信即使可以出碟，吹水內容都會被大刪．．．所以在這裏分享一下我記得的，哈
之前都知道「狼來了」原本係梅姐唱，不過後來去到千嬅手上，呢首歌令好多人認識佢，所以千嬅一直好感激梅姐。但今日先知原來「幸福摩天輪」原本係古巨基唱，不過原本歌詞好灰，Eason仲用學友腔唱左幾句添！結果這首歌爆紅，隻碟仲係Eason最賣得既一隻！「我需要的只是愛」當年Eason已經錄好mix好，卻最後落在梁漢文手上。仲有「其實我記得」原本係梁漢文同李玫合唱架！（當時李玫仲未成為國際大星）結果變左千嬅同Eason第一首合唱歌～
千嬅講左佢同Eason同Chok神響大馬ge詭異經歷，當晚佢地三個響房傾計，Eason好快響地下訓左，間房d燈突然閃閃下，熄左開返又繼續閃，叫左酒店職員黎睇，熄左燈掣都繼續閃，個職員二話不說走左，淨低千嬅同Chok神（Eason仍然睡覺中），佢地叫埋其他同事黎，結果搞到第二朝，成間房有三十人，Eason起身一句：「你地傾到宜家呀？」哈哈，其實點解佢地唔離開間房呢？By the way，之後千嬅話Chok神當時響房爆晒粗，話要惡過「佢地」，但果時千嬅以為佢鬼上身！
當年娛樂滿天星節目，早上11點開咪，主持phone in Eason，周國豐：「播完音樂，一分鐘後就接你入黎架啦」Eason：「好，無問題」結果，主持喂果陣，Eason訓著左．．．哈哈，後來Eason再爆原來佢唔係第一個，第一人係校長譚詠麟。Eason話以前華星做新人好多野做，仲要佢朝早7點起身，做青年大使，笑住唱「不一樣的夏」。可惜佢地只係唱左幾句，無再次合唱成首歌。
千嬅講到兩三年前覺得做野好公式，想唔做呢行，放慢腳步。Eason問千嬅係咪轉去幫人打針（因千嬅護士出身），後黎又問Edmond識唔識摺報紙（其實應該係疊報紙？），跟住講自己摺衫好叻，千嬅就話：「我老公都係喎」，Eason一臉不滿話：「又你老公～你可以叫佢摺紙鶴祝福日本」
當Eason不停吹水之時
千嬅：跟住呢
Eason：跟住...（繼續講）
千嬅：咁跟住呢
Eason：跟住...（繼續講）
千嬅：咁跟住呢
Edmond：你仲問跟住，佢唔會完架啦
千嬅：我就係想知個結論係咩
Eason：我講野一向都無結論既
大家記得其他也可以在這裏留言分享一下:)
Rundown
1 新世紀福音戰士（楊千嬅）
2 隨時行樂（梁漢文）
3 第五個現代化（陳奕迅）
4 美麗有罪（陳奕迅）
5 懶音哥（梁漢文）
6 斗零踭（楊千嬅）
7 纏綿遊戲 [原: 梁漢文]（陳奕迅 x 楊千嬅）
8 好朋友 [原: 梁漢文]（楊千嬅）
9 重新做人（梁漢文）
10 不再問究竟 [原: 陳百強]（陳奕迅 x 梁漢文）
11 一再問究竟（梁漢文）
12 衣櫃裡的男人（梁漢文）
13 新聞女郞 [原: 梁漢文]（陳奕迅）
14 呼吸困難 [原: 梁漢文]（陳奕迅 x 梁漢文）
15 如果這一秒鐘你跟我講你不愛我（陳奕迅）
16 六月飛霜（陳奕迅）
17 傷信 [原: 陳奕迅]（梁漢文）
18 洋蔥（楊千嬅）
19 火鳥（楊千嬅）
20 貝多芬與我（陳奕迅）
21 飛女正傳 [原: 楊千嬅]（梁漢文）
22 最後的歌（楊千嬅）
23 明年今日 [原: 陳奕迅]（楊千嬅）
24 狼來了 [原: 楊千嬅]（陳奕迅）
25 其實我記得（陳奕迅 x 楊千嬅）
26 我需要的只是愛 [原: 梁漢文]（陳奕迅）
27 拔河（陳奕迅 x 梁漢文）
28 滾（梁漢文 x 楊千嬅）
29 大激想（陳奕迅 x 梁漢文 x 楊千嬅）
沒有留言:
張貼留言